【克羅地亞】 杜布羅夫尼克 皇者古城

土包子第一日就去咗Dubrovnik 杜布羅夫尼克 最有名嘅景點 – 老城區 Old Town。

Games of Thrones 杜布羅夫尼克 皇者古城

呢個中古城市於近年受旅客熱捧都係因為佢係美劇Game of Thrones 嘅取景地方。有無GOT fans 覺得呢到好眼熟呢？！就係King’s Landing 啦！ Shame！

城內必去景點 The Wall 城牆！

Old Town嘅一大景點就係一道圍城而建嘅高牆 – The Wall 。圍住城牆行唔止可以由高處睇哂城內景色，仲可以飽覽Dubrovnik 對出亞得里亞海嘅迷人景致，係靚到 dom dom 聲㗎吓。

除咗The Wall，其實Old Town 都有唔少嘢睇，基本上成個區都好靚，慢慢行會發現唔少影相靚位，而城中好多有特色嘅樓梯，可以比大家瘋狂影chok相。

The Wall嘅門票150Kuna（約185HKD）除左城牆，仲包城外另一邊一個叫Lovrijenac 嘅塔，係個到影到Old Town全景。想出海同陽光玩遊戲同遠眺Old Town，就可以去港口報團（有啲貴而且好快就玩完）。

色、香、味一流 Lady Pi Pi 嘆住睇全景日落

聽BnB個姐姐介紹，港口個邊有唔少好食又唔貴嘅餐廳，但為咗慳錢，土包子就無試啦，我哋多數去超市買食材自己煮 （啲肉，菜同生果好新鮮、好好食！）。 係The Wall 行嘅時候聞到一間庭園式裝修嘅餐廳發出陣陣灰燒香氣，吸引土包子去食好西！原來就係大名鼎鼎嘅Lady Pi Pi ，土包子去強推吞拿魚排同青口，十分新鮮惹味！除咗美食，係位處樓梯最頂嘅Lady Pi Pi 仲可以享受 Old Town嘅全景。個日我哋一路睇日落，一路飲住白酒再嘆好西…諗起都想再去！

杜布羅夫尼克

地址：Poljana Paska Miličevića, 20000, Dubrovnik, Croatia

Lady Pi Pi

地址：Antuninska ul. 23, 20000, Dubrovnik,Croatia
Tips: 早少少去排隊，可以一次過欣賞日落同夜景，而且避開人潮。