唔連殼，淨長六吋嘅珍寶蠔有蒜蓉燒、火焰、黑松露忌廉燒三款口味。九月限定嘅冬陰公海鮮鍋非常足料，目測有10隻大蝦，仲要用龍蝦湯做湯頭，勁惹味！
當中包括蒜蓉燒 $48、火焰燒 $58、黑松露忌廉燒 $68，散叫又得拼盤咁叫都得。每隻生蠔雖然大小唔一定一樣，但一定隻隻都勁大隻！記者以為自己係生蠔愛好者，一次食十打無難度啦！點知食完三大隻之後真係有少少飽喎。
與iPhone6s的對比，一睇就知幾大隻啦
仲大過記者隻手呀！
最大個隻連殼真係有8吋，唔連殼都有6吋！
當中的火焰燒辣辣地，同蒜蓉燒的生蒜不同，再多加辣椒，入口夠辛，但唔算太辣。而黑松露忌廉燒則是重口味之選，極重黑松露香！記者最鍾意都係火焰燒。
每月都有的限定鍋今個月係冬陰公，原價$268，特價$168，至於優惠做到何時就唔知道喇。
笑蝦蝦冬陰公海鮮鍋 原價$268 特價$168
用上龍蝦湯頭做湯底，所以食落細心留意係有少少龍蝦香！入面都勁足料，目測有10隻大頭蝦，仲有勁多蜆肉，食落少少香辣，食完湯料仲可以打邊爐。
勁足料湯底！4-6人食都得呀
原價$118，特價$78。同樣唔知道特價會做到幾時，只知道呢個價錢可以食到雞煲之後再打邊爐真非常抵食，亦係冬陰公以外的另一選擇。雞煲可選辣度，最低是BB辣，始終雞煲點都要辣辣地先夠惹味。記者揀既小辣，嗜辣者一定覺得唔夠辣呀！雞件斬得細細件，都幾易食。
雞煲可選辣度，BB辣到大辣任君選擇。
咁多游水海鮮喺隔離，當然要叫多啲！兩款鮑魚都大大隻，用冰鎮住上，可選原隻上或切片上。酒槽味帶有陣陣酒香，清新醒胃；滷水味亦夠味，冰凍口感一流。
原隻上的大大隻鮑魚
以為係真嘅奶皇包？少年，你太年輕了。事實係人手即叫即打墨魚膠，中間包著爆餡流沙奶皇，是咪聽到都想食？黑松露蝦丸又係重口味之選，勁重黑松露味，完全蓋過其他味道。
一客六粒，六個人食無咁飽。
用冬陰公湯烚嘅奶皇包，唔好烚超過2分鐘，否則中間流沙好易熟！
地址：旺角白布街4號地舖
電話：5334 8198
營業時間：1830-0230
Facebook: www.facebook.com/afishionadomk/
