【廣州】海珠湖公園四季 花海

10月頭，土包子就黎左個廣州快閃一日遊，今次就去左廣州市中心嘅綠州、天然氧氣吧、市肺(國內景點嘅獨特名稱) – 海珠湖公園睇雛菊 花海 ，就當住北海道富良野pre trip先！

珠三角一日遊！快手影雛菊 花海

土包子唔係下下都歐遊、個個月都出國咁離地嘅，有時候近近地係珠三角黎個一日遊其實都好有驚喜同旅遊嘅快感，而且平、快、正，唔洗下下都行山、行街、睇戲、食飯。今次就去左廣州市中心海珠湖公園睇雛菊花海！

海珠湖公園四季花海

海珠湖公園係2011年落成，免費開放，園內有唔少嘅復古涼亭、廁所、電瓶車(即係觀光車，5RMB/一位)，玩唔夠喉嘅附近仲有國家級濕地公園(收費)。圍住公園主要行人路行一圈大約1小時，當然唔計影相位啦。土包子行左15分鐘已經望遠處嘅一大片金黃嘅花田，咁啱10月嘅花係土包子最愛嘅小雛菊！花嘅種類會隨住季節而變，四季不同，好有驚喜同新意！放心，花海範圍非常遼闊，可以走入去花田影相，唔怕人多過花，就算有10個大媽一齊fing巾都招架到！

花海背後的新CBD商圈珠江新城

遠眺有廣州電視塔「小蠻腰」同近年大力發展嘅新CBD商圈珠江新城，以高樓大廈作花海背景，成個構面好有層次同獨特性。花海另一邊有一條長廊觀鳥，吸引到一家大細、攝影發燒友，仲有唔少人沿住湖跑步！

廣州海珠湖公園四季花海／Guangzhou Haizhu Lake Park

Tips: 為避免公路塞車，土包子強烈建議大家係紅磡坐直通車（車程約2小時）或者係深圳羅湖口岸轉乘城際火車（車程約1小時10分鐘）。