西貢新開嘅果汁外賣小店，一次過買到100%純果汁、冷壓果汁、竟然仲有自製汽水！用打汽機加入鮮果打成梳打又得，唔想要汽揀冷壓果汁（Cold-pressed Juice）都得，再買埋盒素魯肉飯，素食野餐一次過搞掂。
擺部打汽機係度，就可以自家即打梳打，口味多達9款！除咗有凍檸賓氣泡飲、咸檸薄荷青檸梳打之外，有兩款仲加入新鮮水果打成。
兩款氣泡飲都加入新鮮水果，所以可以食到粒粒果肉，口感同賣相一流。雜莓加鮮橙帶有橙香，口味清甜；百香果加檸檬酸酸甜甜，非常醒胃。不過飲筒比較幼身，好容易卡住d百香果，搞到飲唔到梳打水。
雜莓＋鮮橙氣泡飲 $28
百香果＋檸檬氣泡飲 $28
除咗主打嘅自家打汽梳打水，唔鍾意飲有汽飲品亦可以揀呢排hit爆嘅冷壓果汁，比一般鮮榨果汁營養價值更高。呢款美肌女神，入面有紅菜頭＋蘋果＋甘筍，出黎既味道比例大約係3:1:6，甘筍味係非常之咁搶，仲可以食到有少少渣添。
美肌女神 $32
淨係飲嘢唔會飽，點都有d嘢要食落肚。小店供應台式麻醬涼麵$25、素魯肉飯$35，不妨買走拎去海旁望住個海食，一個人的浪漫，個魯肉飯都好香冬菇味架！
素魯肉飯 $35
地址：西貢敬民街9號高勝樓地下13號舖
營業時間：星期一至五12pm-8pm；星期六日11am-9pm
