2017 美食博覽 大解讀！入場前必睇！

美食博覽 咁多野，究竟食乜好？小編第一日晨早10點就打頭炮入左美食展掃食 掃到夜晚八點半滿載而歸，不過淨係個肚滿載。小編都無買好多野，只係集中係入面食！

入場前先睇！2017 美食博覽 ！

依家同大家分享下好食野，等大家入去吾洗浪費錢同quota食伏野，肚子同金錢要留給好吃的嘛～另外大家真係要留肚入場呀，入面大部分都有得試食 如果吾係好快就填滿肚子！

一樓展覽廳

原條鰻魚多士 $40（展覽攤位1C-B18）

多士夠脆，入面又有芝士。鰻魚又飽肉軟嫩，呢個味道吾錯既～

▲佢鰻魚真係成條嫁，都抵食！

紅燒吉品鮑 $30（展覽攤位B1-A05）

呢個推薦喔！好補身之$30食齊鮑魚、花膠、海參、花菇。其實好多檔口都有買即食鮑魚，但呢檔係做得幾好食，同埋真係幾抵食～佢地鮑魚做緊試食價$10隻，好多人排隊喔～

▲海參係偏爽脆個身 其他都好腍好入味

焦糖芝士雪糕撻 $25

即買即燒喔！酥皮撻係現成既，味道吾特別。但入面係芝士雪糕，再灑上糖即燒，咬落會變流心芝士呢。芝士味不太濃烈，淡淡的但可以一試～仲有D24榴槤雪糕味揀呢！

▲COCOBERRY 香濃芝味 焦糖 x 芝士 x 雪糕 一炮過呀親～

宇治金時雪糕 $40

上半部分比較多紅豆粒，味道太突出蓋過左抹茶味。

▲溶得有點快，味道方面比較適合紅豆控。

北海道蜜瓜乳酪雪糕 $40

阿菠蘿推出和風系列，有抹茶紅豆雪糕呀！但竟然另一隻味更出色～呢個反而更推薦，味道清新而且仲有蜜瓜粒粒，好細粒既～夏天食真係吾錯，仲無咁易溶添。

▲不過佢地個cone真係麻麻地好食…吾經吾覺，阿菠蘿都要成$40支><但北海道蜜瓜乳酪值得一試

蛋撻王 燕窩蛋撻 $18

係熱爐拎出黎既撻可以凍左既？餡仲要得勁薄勁少，吾係熱辣辣既味道真係差好多…平時分店質素仲好過係會展，真係洗乜係入面食姐，留肚食其他好過，食完覺得$18一件超吾抵食。

▲如果大家真係要買既時候記得問佢係咪仲熱!!

特色焗蟹蓋 $35

大家吾好被佢外表呃左，沒有蟹肉的焗蟹蓋。見到35蚊咁大隻，點知入面全部都係薯泥同幾粒火腿、少量菇，最開心係入面有一粒車打芝士～

▲味道還可以 但不要期待裏面有蟹肉

邪惡芝士大菇 $30

無乜芝味既…味道普通又要咁邪惡，咁真係要留quota食其他喇。味道真係一般左啲，只係一片普通芝士，你睇下，芝士無燒過咁濟…芝味吾濃。大啡菇吾夠厚肉，但都多汁既，入面係滿滿調味過既薯泥，小編覺得呢個價錢可以做得更好><

▲同埋真係會有啲飽肚，除非你愛食薯泥同菇，如果吾係不如留位食其他。

海燕椰皇凍 $40

行到咁上下，又攰又渴，黎返個就啱曬！原來一樓好多檔都有賣～不過吾知係咪全部都有加海燕？要睇清楚！可以揀冷/熱，小編揀左冷，食左上層個椰子肉(好食)下面完全係冰～因為佢啱啱先係雪櫃拎出黎，狂插碎佢黎食，排牙凍得濟頂吾順，等佢溶解啲再食～吾知熱既會吾會好飲啲呢～

▲海燕份量吾少，下面其實椰子水變左冰，味道天然又解暑。

三樓展覽廳

流心奶皇包味分子雪糕 $40

LAB MADE分子雪糕都入左展覽廳呀！真係流沙包味！好似仲食到咸蛋黃碎～佢地仲有好多口味賣，杯裝只係$30～但小編下午去既時候，杯裝流沙奶皇包味已經被掃空><唯有買現製$40～要買杯裝流沙奶皇包味要早啲買。

▲味道吾錯，即買即整，加入乾冰時吸引大量人潮圍觀

Pizza $10

$10一塊pizza！仲要勁拉絲，吾食真係對唔住自己。上面有風乾火腿，無留意係邊度製造，不過重點係件pizza芝士味好香。味道又吾會過分濃烈，拉絲cheese再加上批底勁勁勁香脆，火腿已成為配角，芝士控必食啦！佢地咁有賣用芝士磚做盤既炒卡邦尼意粉，$20 ONLY！

▲味道又吾會過分濃烈，拉絲cheese再加上批底勁勁勁香脆，火腿已成為配角，芝士控必食啦！

三樓尊貴區

黑松露醬Raclette溶岩芝士魚蛋 $35(2粒)

好好好香濃既黑松露味！份量一啲都吾吝嗇，芝士咸香加上爽口彈牙又大粒既白魚蛋，值得食呀～

▲芝士咸香加上爽口彈牙又大粒既白魚蛋

椰子布甸 $30

100%素食，無雞蛋無牛奶無椰奶，咁健康點解可以咁好食！價錢就較貴，買6杯$168，但有得試食，行過記得試下。仲有朱古力味～小編就鍾意椰子味多啲！

▲上面係椰子水加椰子肉，下面就係椰子布甸，甜度適中，感覺天然好味道

美式乳酪蛋糕 $15/1 $25/2

一開始見勁多人拎住呢舊芝士蛋糕，以為係咪真係咁好食～覓左一番，終於被小編搵到，但食完之後，覺得咁多人買既原因應該係純粹因為佢好平…

▲味道真係一般，芝士味吾夠香醇，餅底無乜味，感覺雪左好耐咁

芝士BB $25

一盒6個$150，可以散買$25個，買多又無平，大家可以散買個黎試下先。味道同感覺完全係食緊半熟工房隻半熟芝士蛋糕～同樣係海綿蛋糕底，但小編覺得半熟工房芝味香啲，依件大件少少咁姐～大家如果想食雪糕質感既芝士BB，要請店員係雪櫃即刻拎比你！佢放係出面攤左一陣嗰啲已經無咁凍 口感較creamy，睇下大家好邊種口感。

▲大家如果想食雪糕質感既芝士BB，要請店員係雪櫃即刻拎比你！

2017美食博覽

地址：灣仔香港會議展覽中心 Hall 1 & 3
時間：2017年8月17日至8月20日 10:00 – 22:00；2017年8月21日 10:00 – 18:00
收費：公眾館門票 $25；公眾館+尊貴美食區 $40